आदरणीय दाजुभाई तथा दिदीबहिनीहरु
नमस्कार !
सर्व प्रथम, वर्ष २०७७ (सन् २०२०/२१) मा यहाँ र यहाँको परिवारको सुरक्षित सुस्वास्थ्य तथा सुख-समृद्धिको कामना गर्दछौं ।
विश्वव्यापी कोरोना संक्रमण बीच आवश्यक सुरक्षाका उपायको पालना गरी मे महिनादेखि मन्दिरमा पूजा अर्चनाको नियमित सेवा पुनः सुचारु गरिएको सबैमा ज्ञात नै छ । साथै, अनलाइन (भर्च्युअल्) प्रविधिको उपयोग गरी घरबाट नै श्रीपशुपतिनाथ लगायत देवी देवताहरुको पूजा अर्चना गर्न सकिने व्यवस्थालाई पनि निरन्तरता दिइएको छ । गत जुन २१ देखि दैनिक साँझ ६:०० बाट ६:३० सम्म श्रीमद्भागवतको पारायण तथा प्रवचन सुचारु रहेको छ, जुन NCSC को आधिकारिक फेसबुक PujaSamiti बाट प्रत्यक्ष प्रसारण भैरहेको छ ।
कोरोना महामारी सुरु भएसंगै मन्दिरमा भक्तजन दर्शनार्थीहरुको आगमन ठप्प प्रायः हुनु स्वभाविक नै हो । परिणामस्वरूप बिगत चार महिनादेखि मन्दिरको आम्दानी लगभग शुन्यमा झरेको छ । तर, प्राय: सबै जसो मासिक खर्च भने यथाबत भैरहेको छ जसले गर्दा आर्थिक संकटको सामना गर्नु परेको जानकारी गराउन बाध्य भएका छौं ।
यूलेस परियोजनाका लागि संकलित रकम मन्दिरको मासिक खर्चमा प्रयोग नगर्ने कार्यकारिणी समितिको नीति रहेको यहाँहरुलाई पुन:स्मरण गराउन चाहन्छौँ ।
तसर्थ यस बिषम परिस्थितिबाट मन्दिरलाई पर्न गएको आर्थिक संकट टार्न तत्कालका लागि पुनः एकपटक यहाँहरुको इच्छा अनुसार आर्थिक सहयोग गरिदिनु हुन यहाँहरु सबैमा बिनम्र अनुरोध गर्दछौं |
यहाँहरुले, NCSC को वेबपेज www.ourncsc.org मा वा http://www.ourncsc.org/donate.php मा थिची क्रेडिट वा डेबिट कार्डबाट अथवा मन्दिरमै गएर चेक, नगद वा कार्डबाट अथवा मन्दिरको ठेगानामा चेक पठाएर दान गर्न सक्नु हुन्छ ।
स्थानीय रूपमा मनाइने तिथि चाड पर्व आदिको बिषयमा जानकारी दिने उद्देश्यले यस संस्थाबाट प्रकाशित २०७७ सालको पात्रो र क्यालेन्डर मन्दिरबाट प्राप्त गर्न सकिने जमेत जानकारीको लागि अनुरोध गर्दछौं ।
यस संस्थाको दिगो उन्नतिकोलागि गरी आउनु भएको अमूल्य सहयोग र समझदारीको निरन्तरताको लागि यहाँहरुप्रति आभारी छौं ।
